បង្ក្រាបសង្វៀនជល់មាន់ៈ ឃាត់ខ្លួន ៣ នាក់ ដកហូតមាន់ជល់ និងម៉ូតូ ~ MCNTVONLINE

បាត់ដំបងៈ កាលពីរសៀលថ្ងៃទី២៩ ខែមករា ឆ្នាំ២០២១កម្លាំងអធិការដ្ឋាន នគរបាល ស្រុកថ្មគោល សហការជាមួយ កម្លាំងនគរបាល ប៉ុស្តិ៍អូរតាគី និងប៉ុស្តិ៍គោកឃ្មុំ បានចុះបង្ក្រាបកន្លែងស៊ីសង ប្រជល់មាន់ មួយកន្លែង ដោយបានឃាត់ខ្លួនមនុស្ស ៣ នាក់ រឹបអូសមាន់ជល់ ចំនួន ៥ក្បាល និងម៉ូតូ ២៣ គ្រឿង នៅចំណុចវាលស្រែ បឹងព្រៃ ស្ថិតក្នុង ភូមិត្រស់ ឃុំអូរតាគី ស្រុកថ្មគោល។

លោកវរសេនីយ៍ឯក ផង់ សុភាព អធិការនគរបាល ស្រុកថ្មគោល បានឱ្យដឹងថាៈ ក្រុមអ្នកញៀនល្បែងជល់មាន់ ជាបុរសទាំង ៣ នាក់នោះ រួមមានៈ ១.ឈ្មោះ ស៊ុប សំអឿន អាយុ៥៤ឆ្នាំ , ២.ឈ្មោះ ព្រិល បុល អាយុ ៣៨ ឆ្នាំ ពីរនាក់នេះ រស់នៅភូមិចែងក្តារ ឃុំភ្នំសំពៅ ស្រុកបាណន់ និង ៣.ឈ្មោះ ប៊ុន លី អាយុ ៥៤ ឆ្នាំ រស់នៅភូមិជ្រៃ ឃុំជ្រៃ ស្រុកថ្មគោល។ ចំណែកវត្ថុតាងដកហូតបាន រួមមាន: មាន់ជល់ចំនួន ៥ ក្បាល សង្វៀនជល់មាន់ ចំនួន២ ជញ្ជីងតូចថ្លឹងមាន់ ចំនួន១គ្រឿង ម៉ូតូចំនួន ២៣ គ្រឿង កំរាលក្រាលចំនួន ២ និងឆ្នាំងសម្រាប់ស្អំមាន់ ចំនួន២។

លោក ឈឿង គឹមសុង បានបញ្ជាក់ថាៈ ក្រោយពីបានឃាត់ខ្លួន ក្រុមអ្នកញៀនលេង ល្បែងស៊ីសង មាន់ជល់ ទាំងបីនាក់ រួមជាមួយវត្ថុតាង ត្រូវបានសមត្ថកិច្ចជំនាញកសាង សំណុំរឿង បញ្ជូនបន្ត ទៅកាន់សាលាដំបូង ខេត្តបាត់ដំបង ដើម្បីចាត់ការតាមច្បាប់៕/V-PC