លោក ស សុខា អញ្ជើញបើកសន្និបាតបូកសរុបលទ្ធផលការងារ ឆ្នាំ២០២១ និងលើកទីសដៅការងារ ឆ្នាំ២០២២ របស់ក្រុមប្រឹក្សាយុវជនគ្រឹះស្ថានឧត្តមសិក្សា

     

(ភ្នំពេញ)៖ លោក ស សុខា អនុប្រធានសហភាពសហព័ន្ធយុវជនកម្ពុជា (សសយក) និងជាប្រធានក្រុមប្រឹក្សាយុវជនគ្រឹះស្ថានឧត្តមសិក្សា នៅព្រឹកថ្ងៃទី២៥ ខែមីនា ឆ្នាំ២០២២នេះ បានអញ្ជើញជាអធិបតីភាពបើក «សន្និបាតបូកសរុបលទ្ធផលការងារ ឆ្នាំ២០២១ និងលើកទីសដៅការងារ ឆ្នាំ២០២២ របស់ក្រុមប្រឹក្សាយុវជនគ្រឹះស្ថានឧត្តមសិក្សា»។

ខណៈកម្មវិធិបិទនឹងធ្វើឡើងក្រោមអធិបតីភាពរបស់លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា។ កម្មវិធីនេះនឹងព្រឹត្តធ្វើឡើងរយៈពេល១ថ្ងៃពេញ មានការអញ្ជើញចូលរួមសំណាក់ថ្នាក់ដឹកនាំ សមាជិក សមាជិកាយ៉ាងច្រើនកុះករនាសណ្ឋាគារសុខាភ្នំពេញ។

លោក ស សុខា បានឱ្យដឹងថា ក្នុងការពង្រីកសកម្មភាពរបស់ខ្លួន សហភាពសហព័ន្ធយុវជនកម្ពុជា (ស.ស.យ.ក.) បានបង្កើតក្រុមប្រឹក្សាយុវជនគ្រឹះស្ថានឧត្តមសិក្សា(ក.យ.គ.) នៅថ្ងៃទី១៨ ខែកុម្ភៈ ឆ្នាំ២០២១ ជាអង្គភាពសេនាធិការ ដើម្បីបំពេញភារកិច្ច និងធ្វើសកម្មភាពនានាទាក់ទងទៅនឹងការងារយុវជន និងការផ្តល់ផលប្រយោជន៍ដល់យុវជនដែលជានិស្សិតនៅតាមគ្រឹះស្ថានឧត្តមសិក្សារដ្ឋ និងឯកជន នៅទូទាំងប្រទេស។

នាឱកាសនោះដែរ លោក បានបន្តថា ក្រុមប្រឹក្សាយុវជនគ្រឹះស្ថានឧត្តមសិក្សា មានភារកិច្ចសំខាន់ៗក្នុងការចូលរួមចំណែកលើកកម្ពស់សមត្ថភាព អប់រំសីលធម៌ និងបណ្តុះមនសិការជាតិដល់យុវជនឱ្យក្លាយទៅជាធនធានមនុស្សដ៏ល្អសម្រាប់សង្គមជាតិ ព្រមទាំងកៀរគរយុវជនដែលកំពុងសិក្សានៅតាមគ្រឹះស្ថានឧត្តមសិក្សា ឱ្យចូលរួមសហការក្នុងសកម្មភាពនានា របស់ ស.ស.យ.ក.។

លោក ស សុខា បានបញ្ជាក់ថា ដើម្បីបំពេញភារកិច្ចដ៏មានសារៈសំខាន់នេះ ក.យ.គ. បានរៀបចំរចនាសម្ព័ន្ធដែលមានលេខាធិការដ្ឋាន និងផ្នែកចំណុះចំនួន៧ រួមមាន៖ ផ្នែកយុវជនគ្រឹះស្ថានឧត្តមសិក្សា ផ្នែកហិរញ្ញវត្ថុ ផ្នែកបណ្តុះបណ្តាល អាហារូបករណ៍ និងរកការងារធ្វើ ផ្នែកទំនាក់ទំនងសាធារណៈ និងការងារសហគមន៍ ផ្នែកព័ត៌មាន និងផ្សព្វផ្សាយ ផ្នែកផែនការ និងស្រាវជ្រាវ ផ្នែកព័ត៌មានវិទ្យា និងគ្រប់គ្រងទិន្នន័យ៕

Posted in: ព័ត៌មានជាតិ