Wednesday, May 04, 2022
mcntvonline
កំពង់ឆ្នាំងៈ ផ្លូវបេតុងចំនួន ៦ ខ្សែ នៅក្នុងភូមិ ៤ នៃសង្កាត់ប្អេរ កំពុងដំណើរការកសាងហើយ ដើម្បីជួយសម្រួលដល់ ការធ្វើចរាចរណ៍ទៅមក ជូនប្រជាពលរដ្ឋ ដែលនេះជាសមិទ្ធផលថ្មីមួយទៀត របស់ក្រុងកំពង់ឆ្នាំង ក្រោមការដឹកនាំ របស់លោក ស៊ុន សុវណ្ណរិទ្ធិ អភិបាលនៃគណៈអភិបាល ខេត្តកំពង់ឆ្នាំង។
លោកស្រី ឌុច ម៉ូលី ចៅសង្កាត់ប្អេរ បានឱ្យដឹងនៅរសៀល ថ្ងៃទី៣ ខែឧសភា ឆ្នាំ ២០២២ នេះថាៈ ក្រោមការដឹកនាំដ៏ត្រឹមត្រូវ របស់សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ហេដ្ឋារចនាសម្ព័ន្ធផ្លូវថ្នល់ បាននិងកំពុងអភិវឌ្ឍន៍ នៅគ្រប់មូលដ្ឋាន ។ និយាយដោយឡែក នៅក្នុងសង្កាត់ ប្អេរ ក្រុងកំពង់ឆ្នាំង ក្រោមការដឹកនាំរបស់លោក យិន សាវេ៉ន អភិបាលក្រុងកំពង់ឆ្នាំង និងលោក ស៊ុន សុវណ្ណរិទ្ធិ អភិបាលនៃគណៈអភិបាល ខេត្តកំពង់ឆ្នាំង នៅក្នុងឆ្នាំ២០២២ នេះ រដ្ឋបាលសង្កាត់ប្អេរ បានចំណាយថវិកាបដិភាគ របស់សង្កាត់ សរុបចំនួនជាង ៣០០ លានរៀល និងទុនចូលរួមរបស់ប្រជាពលរដ្ឋ ៤ ភូមិ សរុបមានចំនួន ១ លានរៀល បានកសាងផ្លូវបេតុង ចំនួន ៦ ខ្សែ មានប្រវែងសរុប ចំនួនជាង ៩៤៧ ម៉ែត្រ នៅក្នុងភូមិ ៤ នៃសង្កាត់ប្អេរ ក្រុងកំពង់ឆ្នាំង ។
លោកស្រី ចៅសង្កាត់ បានបន្តឱ្យដឹងទៀតថាៈ ផ្លូវបេតុង មានទទឹង ៥ ម៉ែត្រ កម្រាស់ ១តឹកកន្លះ បានកសាង ២ ខ្សែ គឺ១ខ្សែ នៅក្នុងភូមិម៉ុងបារាំង មានប្រវែង ៣៤២ ម៉ែត្រ និង ១ខ្សែទៀត នៅក្នុងភូមិប្អេ មានប្រវែង ១៩១ ម៉ែត្រ សរុបទាំង ២ខ្សែ មានប្រវែង ៥៣៣ ម៉ែត្រ ចំណាយថវិកាសរុប ចំនួន ១២៨.១៣៧.៦៣៩ រៀល កំពុងដំណើរការកសាង បាន ៥០ ភាគរយហើយ។
ដោយឡែក ផ្លូវបេតុងទទឹង ៤ ម៉ែត្រ កម្រាស់ ១តឹកកន្លះ កសាងចំនួន ៤ ខ្សែទៀត មានប្រវែងសរុប ៤១៤ ម៉ែត្រ គឺ ២ ខ្សែ នៅក្នុងភូមិឃ្លាំងប្រាក់ និង ២ ខ្សែទៀត នៅ ក្នុងភូមិធម្មយុត្តិ ដែលកំពុងដំណើរការត្រាស់សេផ្លូវ ដោយត្រូវចំណាយថវិកាសរុប ចំនួន ១៨៨.២៥០.១២០ រៀល ។
លោកស្រី ចៅសង្កាត់ប្អេរ ក៏បានអំពាវនាវផងដែរ ដល់ប្រជាពលរដ្ឋ ប្រជាការពារ និងលោកមេភូមិ ទាំង ៤ ស្នើសុំជួយថែរក្សា ការពារផ្លូវបេតុងទាំង ៦ ខ្សែនេះ ទាំងអស់គ្នា ដូចជាកុំឲ្យរថយន្តធុនធ្ងន់ បើកបរលើផ្លូវបេតុងនេះ ដើម្បីឲ្យផ្លូវបេតុងនេះ បានគង់វង្ស និងប្រើប្រាស់ បានយូរអង្វែង ។
ជាមួយគ្នានេះផងដែរ លោកស្រី ចៅសង្កាត់ សូមអំពាវនាវដល់ប្រជាពលរដ្ឋទាំងអស់ ក្នុងសង្កាត់ ត្រូវបំពេញកាតព្វកិច្ច ជាពលរដ្ឋល្អ ដោយសូមទៅចូលរួមបោះឆ្នោតជ្រើសរើស ក្រុមប្រឹក្សាឃុំសង្កាត់ ដែលជាថ្នាក់ដឹកនាំល្អ បំរើប្រជាពលរដ្ឋ ឲ្យបានគ្រប់គ្នាៗ នៅថ្ងៃទី ៥ ខែមិថុនា ឆ្នាំ២០២២ ខាងមុខនេះ ៕
0 Comments:
Post a Comment