តម្លៃសេវាទឹកកខ្វក់ នឹងត្រូវបញ្ចូលក្នុងវិក្កយបត្រតែមួយជាមួយទឹកស្អាត បន្ទាប់ពីក្រសួង ស្ថាប័ន និងភាគីពាក់ព័ន្ធ ឯកភាពគ្នាជាធ្លុងមួយក្នុងការដាក់ឱ្យអនុវត្តនូវសេវាកម្មនេះ។ ឯកឧត្តម កឹម បូរី អនុរដ្ឋលេខា ធិការក្រសួងសាធារណការ និងដឹកជញ្ជូន និងជាប្រធានគ្រប់គ្រង និងសម្របសម្រួលគម្រោងអភិវឌ្ឍន៍សមត្ថភាពសម្រាប់ការងារគ្រប់គ្រងទឹកកខ្វក់ មានប្រសាសន៍ថា ការដាក់ បញ្ចូលតម្លៃសេវាទឹកកខ្វក់ទៅក្នុងវិក្កយបត្រទឹកស្អាត គឺជាយន្តការមួយ ដែលនឹងរួមចំណែកដល់ការធានាបាននូវនិរន្តរភាព នៃការវិនិយោគលើវិស័យនេះ។ ការថ្លែងបញ្ជាក់នេះ បានធ្វើឡើងក្នុងកិច្ចប្រជុំបូកសរុបស្តីពីបេសកកម្មគាំទ្រដល់ការងារអនុវត្តគម្រោងលើកទី៤នៃ គម្រោងលើកកម្ពស់ការផ្គត់ផ្គង់ទឹកស្អាត និងអនាម័យ ក្រោមហិរញ្ញប្បទានសម្បទានរបស់ធនាគារពិភពលោក ដែលរៀបចំឡើងដើម្បីពិនិត្យពិភាក្សា លើយន្តការកំណត់ និងការប្រមូលថ្លៃសេវាប្រើប្រាស់ប្រព័ន្ធលូ និងប្រព័ន្ធចម្រោះទឹកកខ្វក់ សំដៅធានាដល់ការទ្រទ្រង់លើការវិនិយោគក្នុងវិស័យនេះ និងជំរុញប្រតិបត្តិការ និងថែទាំប្រព័ន្ធចម្រោះទឹកកខ្វក់ ប្រកបដោយសមធម៌និរន្តរភាព ជាពិសេសក្នុងគោលបំណងចូលរួមថែរក្សាអនាម័យ សុខភាពសាធារណៈ ព្រមទាំងលើកកម្ពស់សោភ័ណភាព និងកែលម្អបរិស្ថានធម្មជាតិ។ អង្គប្រជុំដែលមានការចូលរួមពីមន្ត្រីជាន់ខ្ពស់ក្រសួងសាធារណការ និងដឹកជញ្ជូន និង មន្រ្តីគម្រោងក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវា នុវត្តន៍ តំណាងក្រសួងសេដ្ឋកិច្ច និងហរិញ្ញវត្ថុ តំណាងធនាគារពិភពលោក និងភាគីពាក់ព័ន្ធ បាន ពិនិត្យទៅលើការងារបច្ចេកទេស កិច្ចការលទ្ធកម្ម កិច្ចការ ហិរញ្ញវត្ថុ កិច្ចគាំពារបរិស្ថាននិងសង្គម ដែលបានអនុវត្តកន្លងមក បញ្ហាប្រឈម និងដំណោះស្រាយ ដើម្បីជំរុញការអនុវត្តន៍នូវសកម្មភាពការងារនៃគម្រោងលើកកម្ពស់ការផ្គត់ផ្គង់ទឹកស្អាត និងអនាម័យទៅតាមផែនការដែលគ្រោងទុក។ សូមបញ្ជាក់ថា ក្រសួងសាធារណការ និងដឹកជញ្ជូន ក៏បាននិងកំពុងរៀបចំសេចក្តីព្រាងច្បាប់ស្តីពីទឹកកខ្វក់ និងប្រព័ន្ធលូ ក្នុងគោលបំណងថែរក្សាអនាម័យបរិស្ថាន ធ្វើឱ្យប្រសើរឡើងដល់ការគ្រប់គ្រងទឹកកខ្វក់ ព្រមទាំងរៀបចំចម្រោះទឹកកខ្វក់ និងប្រព័ន្ធលូនៅក្នុងគម្រោងអភិវឌ្ឍន៍ និងការសាងសង់ហេដ្ឋារចនាសម្ព័ន្ធនានា ឱ្យស្របតាមកម្រិតបទបញ្ញត្តិបច្ចេកទេស និងស្តង់ដារបរិស្ថាន៕វិទ្យុជាតិកម្ពុជា , វ៉ាង ភក្តី ២៨ ០៥ ២០២១
![](https://static.information.gov.kh/rails/active_storage/representations/eyJfcmFpbHMiOnsibWVzc2FnZSI6IkJBaHBBMEJUQWc9PSIsImV4cCI6bnVsbCwicHVyIjoiYmxvYl9pZCJ9fQ==--490e1a322b365d3b13266b797a6d37d14be834ac/eyJfcmFpbHMiOnsibWVzc2FnZSI6IkJBaDdCam9MY21WemFYcGxTU0lNT1RBd2VEWXdNQVk2QmtWVSIsImV4cCI6bnVsbCwicHVyIjoidmFyaWF0aW9uIn19--70cbddbba2e46c7ca8ac0c1f8b8316d88752e16d/6E074F7D-FCB8-4B2D-A59A-5328367.jpeg)
![](https://static.information.gov.kh/rails/active_storage/representations/eyJfcmFpbHMiOnsibWVzc2FnZSI6IkJBaHBBejlUQWc9PSIsImV4cCI6bnVsbCwicHVyIjoiYmxvYl9pZCJ9fQ==--a191f6a8cf770c4c25f2ba7a991ddd17a16ca000/eyJfcmFpbHMiOnsibWVzc2FnZSI6IkJBaDdCam9MY21WemFYcGxTU0lNT1RBd2VEWXdNQVk2QmtWVSIsImV4cCI6bnVsbCwicHVyIjoidmFyaWF0aW9uIn19--70cbddbba2e46c7ca8ac0c1f8b8316d88752e16d/90F2927B-14F1-417F-A646-7E45016.jpeg)
![](https://static.information.gov.kh/rails/active_storage/representations/eyJfcmFpbHMiOnsibWVzc2FnZSI6IkJBaHBBejVUQWc9PSIsImV4cCI6bnVsbCwicHVyIjoiYmxvYl9pZCJ9fQ==--9c287473995abe2c0b4fa8dcb0243c7d386a8ac2/eyJfcmFpbHMiOnsibWVzc2FnZSI6IkJBaDdCam9MY21WemFYcGxTU0lNT1RBd2VEWXdNQVk2QmtWVSIsImV4cCI6bnVsbCwicHVyIjoidmFyaWF0aW9uIn19--70cbddbba2e46c7ca8ac0c1f8b8316d88752e16d/9E8DE70B-517E-4236-9891-8CA1382.jpeg)
![](https://static.information.gov.kh/rails/active_storage/representations/eyJfcmFpbHMiOnsibWVzc2FnZSI6IkJBaHBBejFUQWc9PSIsImV4cCI6bnVsbCwicHVyIjoiYmxvYl9pZCJ9fQ==--76ea4398bd7d941129fe930504712a0da9b6595f/eyJfcmFpbHMiOnsibWVzc2FnZSI6IkJBaDdCam9MY21WemFYcGxTU0lNT1RBd2VEWXdNQVk2QmtWVSIsImV4cCI6bnVsbCwicHVyIjoidmFyaWF0aW9uIn19--70cbddbba2e46c7ca8ac0c1f8b8316d88752e16d/9A9BD830-7BA2-4EAA-9D31-99A1671.jpeg)
0 Comments:
Post a Comment