អគ្គពន្ធដារ៖ ត្រឹមថ្ងៃទី១៦ ខែធ្នូ ការប្រមូលចំណូលពន្ធ ឆ្នាំ២០២០ សម្រេចបាន ២,៦៩៧លានដុល្លារ ខណៈឆ្នាំ២០២១ ត្រូវប្រមូលឲ្យ ២,២៧១លានដុល្លារ ~ MCNTVONLINE

(ភ្នំពេញ)៖ លោក គង់ វិបុល ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃអគ្គនាយកដ្ឋានពន្ធដារ បានឲ្យដឹងថា គិតត្រឹមថ្ងៃទី១៦ ខែធ្នូ ឆ្នាំ២០២០ អគ្គនាយកដ្ឋានពន្ធដារ ប្រមូលចំណូលពន្ធបាន ២,៦៩៧លានដុល្លារ ដែលស្មើនឹងជាង៩៤ភាគរយ នៃផែនការដែលកំណត់ដោយរាជរដ្ឋាភិបាល។

ជាមួយគ្នានេះ នៅការប្រមូលចំណូលពន្ធសម្រាប់ឆ្នាំ២០២០ ដែលសល់ប៉ុន្មានថ្ងៃទៀតនោះ លោកអគ្គនាយករំពឹងថា អគ្គនាយកដ្ឋានពន្ធដារនឹងសម្រេចបានតាមផែនការ។

ឆ្លើយតបនឹងសំណួររបស់អង្គភាពព័ត៌មាន ក្នុងកម្មវិធីពិសេសស្តីពី «ការផ្តល់សេវា និងបច្ចុប្បន្នភាព ព្រឹត្តិការណ៍ផ្សេងៗ របស់អគ្គនាយកដ្ឋានពន្ធដារ» លោក គង់ វិបុល បានឲ្យដឹងថា «គិតត្រឹមម៉ោង៦៖០០នាទីល្ងាច ថ្ងៃទី១៦ ខែធ្នូ ឆ្នាំ២០២០នេះ អគ្គនាយកដ្ឋានពន្ធដារទទួលបាន ៩៤.៦៣ភាគរយនៃផែនការ គិតជាតួលេខបានចំនួន ២,៦៩៧លានដុល្លារសហរដ្ឋអាមេរិក ហើយបើប្រៀបធៀបនឹងផែនការ ក្នុងឆ្នាំនេះតាមច្បាប់ដែលអនុម័ត [ច្បាប់បង្កើតមុនការរីករាលដាលនៃជំងឺកូវីដ១៩] តម្រូវឲ្យប្រមូលពន្ធបានចំនួន២,៨៥០លានដុល្លារ»។

លោកបានបន្ថែមថា ក្នុងឆ្នាំ២០២០នេះ ទោះបីជាស្ថិតក្នុងពេលមានជំងឺកូវីដ១៩ក្ដី តែឥទ្ធិពលក្នុងឆ្នាំ២០១៩ ដែលអាជីវករ អាជីវកម្ម និងសហគ្រាសមួយចំនួន រកទទួលទានមានផលចំណេញក្នុងឆ្នាំ២០១៩ច្រើន និងត្រូវដាក់លិខិតប្រកាស ក្នុងឆ្នាំ២០២០នេះ។ ប្រសិនបើមើលចំណូលក្នុងខែនីមួយៗ ពន្ធដារទទួលបានចំណូលគ្រាន់បើនៅឡើយ កត្តាទាំងនេះហើយដែលធ្វើឲ្យ អគ្គនាយកដ្ឋានពន្ធដារ ទទួលបានចំណូលខ្ពស់ ដោយផ្អែកលើលទ្ធផលនៃការចំណេញ ក្នុងឆ្នាំ២០១៩ ជះឥទ្ធិពលក្នុងឆ្នាំ២០២០។

លោកបានបញ្ជាក់ថា ក្នុងឆ្នាំ២០២១ អគ្គនាយកដ្ឋានពន្ធដារ ត្រូវប្រមូលចំណូលពន្ធឲ្យបានចំនួន៧៨ភាគរយ នៃថវិកាក្នុងឆ្នាំ២០២០នេះ ដែលជាចំនួនថយចុះជាងឆ្នាំ២០២០នេះ។ ការថយចុះនេះដោយសារតែ រងផលប៉ះពាល់ពីជំងឺកូវីដ១៩ ក្នុងឆ្នាំនេះ ដែលអាចជះឥទ្ធិពលរហូតដល់៣-៥ឆ្នាំយ៉ាតិច គិតតាមច្បាប់ពន្ធដារ អ្នករកស៊ីខាតក្នុងឆ្នាំនេះ អាចនឹងយោងខាតក្នុងរយៈពេល៥ឆ្នាំ ដូច្នេះបានជាការព្យាករណ៍ក្នុងឆ្នាំ២០២១ មានការថយចុះជាងឆ្នាំ២០២០នេះ។

លោកបន្ថែមថា ក្នុងឆ្នាំ២០២១ អគ្គនាយកដ្ឋានពន្ធដារ ត្រូវរកឲ្យបានចំណូល ឲ្យបានចំនួន ២,២៧១លានដុល្លារសហរដ្ឋអាមេរិក ដែលជាចំនួនថយចុះជាងឆ្នាំ២០២០នេះ។ តែទោះបីជាធ្លាក់ចុះក្តី ក៏ពិបាកក្នុងការទទួលបាន ព្រោះមានការប៉ះពាល់ច្រើន ជាក់ស្ដែងក្នុងខេត្តសៀមរាប វិស័យទេសចរណ៍ថយចុះស្ទើរតែ៩៥ភាគរយ ដែលប៉ះពាល់ធ្ងន់ធ្ងរ ហើយក្នុងឆ្នាំ២០២១នេះ ប្រសិនបើអគ្គនាយកដ្ឋានពន្ធដារ រកបានចំណូលដោយច្បាប់កំណត់ ចាត់ទុកជាជោគជ័យមួយដ៏ធំធេងមួយ។

សូមជម្រាបថា នៅឆ្នាំ២០១៩ កន្លងទៅអគ្គនាយកដ្ឋានពន្ធដារប្រមូលចំណូលសម្រាប់ថវិកាជាតិបានចំនួន ២,៨១៩ លានដុលល្លារ៕