AKP ភ្នំពេញ ថ្ងៃទី០៥ ខែវិច្ឆិកា ឆ្នាំ២០២០
ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍បានលើកឡើងថា ទំនាក់ទំនង និងកិច្ចសហប្រតិបត្តិការរវាងកម្ពុជា និងសិង្ហបុរី ស្ថិតនៅក្នុងកម្រិតមួយគួរឱ្យកត់សម្គាល់ ជាពិសេសផ្នែកឧស្សាហកម្ម និងលើវិស័យកម្មសិទ្ធិបញ្ញាទាក់ទងនឹងកិច្ចសហប្រតិបត្តិការផ្នែកប្រកាសនីយបត្រតក្កកម្ម (Patent Cooperation) ដែលជាជំហ៊ានដំបូង អាចឱ្យកម្ពុជាទទួលការចាប់អារម្មណ៍ពីបណ្តាប្រទេសធំៗជាបន្តបន្ទាប់។ ការលើកឡើងរបស់ឯកឧត្តមកិត្តិសេដ្ឋាបណ្ឌិតនេះ ក្នុងជំនួបជាមួយឯកឧត្តម Michael Tan Keng Siong ឯកអគ្គរដ្ឋទូតសិង្ហបុរីប្រចាំកម្ពុជា ដើម្បីសម្តែងការគួរសម និងជម្រាបលា ក្នុងឱកាសដែលឯកឧត្តមត្រូវបានបញ្ចប់អាណត្តិការទូត រយៈពេល០៤ ឆ្នាំ នៅកម្ពុជា នាព្រឹកថ្ងៃទី០៥ ខែវិច្ឆិកា ឆ្នាំ២០២០ នៅទីស្ដីការក្រសួងឧស្សាហកម្ម។
ឯកឧត្តមកិត្តិសេដ្ឋាបណ្ឌិតទេសរដ្ឋមន្ត្រី ចម ប្រសិទ្ធ បានសម្តែងការស្វាគមន៍ និង វាយតម្លៃខ្ពស់ចំពោះបេសកកម្មការទូតរបស់ឯកឧត្តមឯកអគ្គរដ្ឋទូត Michael Tan Keng Siong នៅកម្ពុជា ក្នុងកិច្ចសហប្រតិបត្តិការយ៉ាងល្អប្រសើរ។ ឯកឧត្តមកិត្តិសេដ្ឋាបណ្ឌិតទេសរដ្ឋមន្ត្រីបានគូសបញ្ជាក់ថា ចំពោះទំនាក់ទំនងជាមួយក្រសួងឧស្សាហកម្ម ជាពិសេសលើវិស័យកម្មសិទ្ធិបញ្ញា ទាក់ទងកិច្ចសហប្រតិបត្តិការផ្នែកប្រកាសនីយបត្រតក្កកម្ម (Patent Cooperation) អាចឱ្យកម្ពុជាទទួលការចាប់អារម្មណ៍ពីបណ្តាប្រទេសធំៗជាបន្តបន្ទាប់ ហើយឈានទៅចុះកិច្ចព្រមព្រៀងលើអនុស្សរណៈយោគយល់គ្នារួមមាន ប្រទេសចិន ជប៉ុន កូរ៉េ សហគមន៍អឺរ៉ុប និងថ្មីៗនេះ ជាមួយសហរដ្ឋអាមេរិក ។
ឯកឧត្តម Michael Tan Keng Siong ឯកអគ្គរដ្ឋទូតសិង្ហបុរីប្រចាំនៅកម្ពុជា ដែលទើបចប់អាណត្តិបានបង្ហាញនូវទឹកចិត្តរីករាយ ចំពោះការបំពេញបេសកកម្មកាទូតដ៏ជោគជ័យនៅកម្ពុជា និងលទ្ធផលផ្លែផ្កានៃទំនាក់ទំនងជាមួយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។ ឯកឧត្តមឯកអគ្គរដ្ឋទូតក៏បានអបអរសាទរចំពោះការប្តូរឈ្មោះក្រសួងឧស្សាហកម្ម ដោយបានបន្ថែមមុខងារនៃវិស័យវិទ្យាសាស្ត្រ បច្ចេកវិទ្យា និងនវានុវត្តន៍នៅក្នុងនោះ ដែលជាវិស័យដ៏មានសារៈសំខាន់ ក្នុងបរិបទនៃបដិវត្តន៍ឧស្សាហកម្មជំនាន់ទី៤។
ឯកឧត្ដមឯកអគ្គរដ្ឋទូតបានបន្ថែមថា តាមរយៈកិច្ចខិតខំប្រឹងប្រែងរួម សេដ្ឋកិច្ចនៃប្រទេសទាំងពីរកម្ពុជា និងសិង្ហបុរី កំពុងមានដំណើរការល្អប្រសើរ បើទោះបីកំពុងជួបវិបត្តិកូវីដ១៩ ក៏ដោយ ព្រមទាំងបានបង្ហាញនូវជំហរសហការគាំទ្រ និងជំរុញការអភិវឌ្ឍបន្ថែមទៀត លើវិស័យវិទ្យាសាស្ត្រ បច្ចេកវិទ្យា និងនវានុវត្តន៍ ដែលជាវិស័យទើបបញ្ចូលថ្មីរបស់ក្រសួង៕
ដោយ ឡុង ស៊ីវ៉ាន់
0 Comments:
Post a Comment